Phili 3 | EMI | STEP | Liuna avalua o, kapughu etoa, me am masimasi ta Vau ngepona ateva. Karika egheelei righi sesa etaghi tani mene piti aatu etaimim llo ngaghe aulia amuela etaimim, ta isaa o voto erooroo tani sausiem.

Philippians 3

Am rau mene atoka tuutuliimim tale uungua vilikiimim

1 Liuna avalua o, kapughu etoa, me am masimasi ta Vau ngepona ateva. Karika egheelei righi sesa etaghi tani mene piti aatu etaimim llo ngaghe aulia amuela etaimim, ta isaa o voto erooroo tani sausiem.

2 Am paniem tale ila o paua atoa isaa o taumattu la gheelei voto karika masina, tau ngai ghelei saasakia viliki etoa. 3 Poli ita isoiso ita. Ita lo atoa ita kakkaua tale Spiriti eteva kanna ia God, ita asaesae Iesu Karisto me karika ita atoka tuutuliita tale uungua vilikiita. 4 Arongona ta aghi arooroo va aghatoka tuutulighi tale isaa o voto.

Arova teva eannaa va eatoka tuutulina tale uungua vilikina, aghi alaulaula. 5 Tale aiaaghaoaluna ateva nau, laghe isoieghila. Aghi atala nge Israeli ieghi, tale ararimangali eteva ta Benjamin, aIbru ieghi me asamasama nge Ibru. ^{▼▼3:5oaIbru ieghi me tuvughu ekapa atoa aIbru ila} Me tale uungua inangari nipaopao, aghi Paresi ieghi. 6 Aghe annaaili isaa o voto, liuna avalua o me aghe uviuvi kapuna atoa Iesu, me karika teva erooroo tani aulia teeieghi, poli aghe nongo usila ngakapa inangari nipaopao.

7 Me tale isaa akapa o salana tani ghelei va aghe ghaa oroi voto, nau ghaine ataataraila va peisaane ila mausi Karisto. 8 Liuna avalua o me ataatara isaa akapa voto peisaane nau aghe toongi teela kinatama voto atoa tani kila Iesu Karisto Vaughu ia. Mausina me aghe velu ekapala voto o, ataatara va nim lao me aue aghaa nonga Iesu. 9 Me aue atoka ta ngetana, karika aue aghulughuluena tale uungua inangari nipaopao, ta aghulughuluena tale niakaaia kanna Karisto, me ia o nighulughuluena ghe kasula ta God tale niaikaaia. 10 Aghanna tani kila Karisto, me sarasarakaniaane tale unna nitottu tale nimate, me tani lao nongina vaalua ghe mmarikanala me tani nongina ia tale matemateaane. 11 Me tale isaa o ase salana, aue arooroo tani totu tale nimate.

Ni-iilou esarasarakana tani laa rekata

12 Karika va ngaghe ghaala isaa o voto va ngaghe ghulughuluenala. Iesu Karisto eposoposoaghi, me akasukasu kkai tani laa ghaa isaa o voto. 13 Kapughu etoa, karika ataataraieghi va ngaghe ghaala isaa o voto. Me kateva nonga voto agheeleia, akakkalua llo emuli etaghi me aghameemeti nonga llo emua etaghi. 14 Aghaimuli usi nonga tani laa rekata tale airuuruu me tani ghaa aipolipoli nongina God ghe koloaghila tani sae epona liu ta Iesu Karisto.

15 Ita akapa lo atoa ngita ghe matuennala ita nna ngamasina isaa o voto. Me arova karika am maemae aitaua tale kasina ninannaa, isaa tee o llo God aue ghelei emasalika etaimim. 16 Me arova vaalua, ita toka nonga tale llo voto ngita ghe kilala.

17 Kapughu etoa, am mae aitaua me am usilaa gheeleiaaghi, me am tani tara amasina lo atoa la kasukasu nongina vaalua ami, ami ghe kasukasu. 18 Poli nongina aghe aulia nonga etaimim oroiaata, me ngamene aulia tee nialousiusi, va oroi lo atoa la tokatoka tani ssatee aikoto ateva ta Karisto. 19 Airuuruu tale kasukasuaaira nitturuu eteae. Kovaira ateva kapuira goto ia me llo tani palata, la aasakea. Me nannaaira etokatoka nonga tale voto tale kosa ateva. 20 Me ita tanganueita epona liu, me earieri ita tani toi teva tau ngai asaangi ekasu okae, Vau ngepona ateva Iesu Karisto etana. 21 Aue eaikolikolia ia oia vilikiita ateva sesa ia ghele nongina vilikina masinaaili, tale sarasarakaniaane erooroo tani ghaa aitaua ngakapa voto me eghelei tale aloaloanaane.